Папата Лав XIV денес во Апостолската палата во Ватикан го прими американскиот кантавтор и поет Боб Дилан, добитник на Нобелова награда за литература, кој е во Рим како дел од италијанската етапа од неговата концертна турнеја „Сурови и немирни патишта“.
Средбата се одржа во краток и срдечен разговор, со размена на поздрави и неколку неформални забелешки, а Дилан носеше црна дуксерка со качулка за време на приемот, објави „Ватикан њуз“.
Папата Лав XIV претходно ги цитираше стиховите на Дилан во предговорот на книгата „Разоружените и оние што се разоружуваат: Мирот е дар“, објавена од издавачката куќа на Ватикан, во која се предупредува на опасноста од глобално вооружување и нуклеарно оружје.
Ова се стихови од песната „Go Away You Bomb“, која Дилан ја напишал во 1963 година, за време на Студената војна. Песната никогаш не била официјално снимена или објавена на ниту еден од неговите албуми, а оригиналниот ракопис бил откриен во 2013 година.
Дилан се сретнал и со еден од поглаварите на Римокатоличката црква во 1997 година, кога настапил на Националниот евхаристиски конгрес во Болоња пред папата Јован Павле Втори и околу 300.000 млади луѓе.
Потоа изведе неколку од своите познати песни, вклучувајќи ја и „Knockin’ on Heaven’s Door“, а папата Јован Павле II го цитираше текстот од неговата песна „Blowin’ in the Wind“ во своето обраќање до младите луѓе, зборувајќи за човечкото достоинство и патот на верата.
Дилан, кој има 85 години, утре ќе одржи концерт во Палацо дело Спорт во Рим, како дел од турнејата што вклучува и настапи во Милано и Болоња.
