Јеменските Хути бараат 51 милијарда долари од Саудиска Арабија и официјално признавање како влада во Јемен со цел да се стави крај на непријателствата, објави „Волстрит џурнал“, повикувајќи се на извори запознаени со разговорите.
Според американскиот весник, Ријад ги прашал Хутите што е потребно за мир, а одговорот бил 51 милијарда долари. Хутите тврдат дека парите ќе бидат компензација за годините саудиски воздушни напади и долгорочната блокада.
Освен пари, тие бараат Саудиска Арабија официјално да ги признае како влада во Јемен. Тоа би го оставило кралството со противник поддржан од Иран на неговата јужна граница.
Разговорите, според WSJ, следеле по нападите на Хутите врз саудиските танкери за нафта во Црвеното Море и заземањето на територијата над стратешкиот теснец Баб ел-Мандеб.
Ријад стравува дека прифаќањето на барањата би можело да поттикне нови напади и нови финансиски барања.
Саудискиот престолонаследник Мохамед бин Салман, пишува весникот, не сака да влезе во преговори пред да постигне воени успеси. Од друга страна, тој се плаши дека испраќањето повеќе копнени трупи би можело да донесе големи загуби и незадоволство во земјата.
Од 2015 година, Саудиска Арабија предводи воена коалиција што ја поддржува меѓународно признатата влада на Јемен во нејзината војна против Хутите, кои го контролираат главниот град Сана.
