Бригадниот генерал Али Балали, советник на командантот на Воздухопловните сили на Иранската револуционерна гарда (ИРГЦ), изјави дека иранските експерти вршат „обратен инженеринг“ на воена опрема запленета од САД за време на 40-дневната војна.
Според иранската државна телевизија „Прес ТВ“, Балали во неделата ги отфрли тврдењата на САД и Израел дека иранската војска е ослабена, нарекувајќи ги „пропаганда и психолошка војна“.
„Различни парчиња опрема и голем број средства се запленети од непријателот, а експертите од одбранбената индустрија моментално ги проучуваат за производство на истите системи“, рече Балали.
Според него, одбранбените капацитети на Иран се зајакнати по војната што Техеран ја нарекува „наметната“. Вооружените сили сега имаат значително повеќе ресурси и опрема, а се зголеми и домашното производство на воена опрема.
„За разлика од некои земји кои се потпираат на странски извори за својата безбедност, Исламската Република Иран не бара увезена безбедност“, рече Балали, најавувајќи продолжување на домашното производство.
„Вооружените сили се подготвени и го држат прстот на чкрапалото, а залихите на оружје потребни за одбрана на земјата се обезбедени со години“, рече тој.
Тој предупреди дека секоја погрешна пресметка или непријателски потег ќе предизвика „суров и разорен“ одговор од Иран.
