Претседателот на Европскиот совет, Антонио Коста, се обиде да го смири германскиот канцелар Фридрих Мерц, по писмото на вториот, во кое тој го услови одобрувањето на следниот буџет на Европската унија со обезбедување финансирање за Украина од страна на сите земји-членки.
Во писмо до кое дојде „Еуроњуз“, Коста наведува дека дискусиите за обете прашања ќе се одржат на крајот од месецот, за време на посебен самит во Брисел, откако Европската комисија ќе презентира предлози за покривање на финансискиот дефицит на Украина.
Сепак, Мерц побарал ова прашање да се дискутира на неформалниот самит оваа недела во Даблин, објавува „Телеграф“.
„Во светлината на тековните случувања, ќе создадам простор за широка дискусија за Украина на претстојниот неформален Европски совет во Даблин“, напиша Коста, оставајќи ја отворена можноста Мерц да го покрене прашањето со други европски лидери.
Европската Унија вети дека ќе покрие две третини од финансискиот дефицит на Украина од 70 милијарди евра, или околу 45 милијарди евра. Механизмот преку кој ќе бидат обезбедени овие средства сè уште не е утврден.
Со оглед на големиот обем на финансиски потреби, можноста за нова рунда заеднички европски долг се смета за главна опција.
Во писмото до Костас, Мерц нагласи дека ветувањето нова финансиска помош за Украина е „суштински предуслов“ за одобрување на следниот буџет на ЕУ.
Овој пристап поврзува две чувствителни прашања, за кои е потребна едногласност од сите земји-членки.
„Поддршката за Украина е прашање на нашата заедничка европска безбедност и затоа распределбата на товарот за оваа поддршка исто така мора да биде споделена“, напиша Мерц.
Сепак, ставот на германскиот канцелар веќе наиде на отпор од Словачка, Чешка, Унгарија и Бугарија. Словачкиот премиер Роберт Фицо го опиша ултиматумот на Мерц како „уцена“.
Овие четири земји бараат да бидат исклучени од какви било идни заеми што Европската Унија може да ги земе за да обезбеди финансирање на Украина.
