Полицијата трага по мажите кои ја ограбија златарницата „Де Бирс“ во центарот на Париз околу 11 часот наутро во четврток, пред да избегаат со мотоцикли.
Париската полиција соопшти дека сторителите покажале оружје за време на грабежот, но не го употребиле, додавајќи дека нема повредени.
Портпаролот на „Де Бирс груп“ потврди дека грабежот се случил во продавницата на компанијата на улицата „Ру де ла Пе“, во близина на плоштадот Вандом – област позната по луксузни продавници за накит.
Портпаролот за агенцијата АП изјави дека нема „сериозни повреди“, дека компанијата им обезбедува поддршка на вработените и дека продавницата ќе остане затворена за да се спроведат истраги, пишуваат странските медиуми, според Телеграф.
Фабиен Богаис, претставник на полицискиот синдикат „Алијанс“ во Париз, им изјави на новинарите на местото на настанот дека четворица осомничени пристигнале вооружени со автоматски пушки и, за неколку минути, украле стока во вредност од стотици илјади евра.
Француските медиуми прикажаа снимки од луѓе облечени во црно и со шлемови како шетаат по тротоарот пред продавницата држејќи оружје, како и снимки од мотоцикли како брзо се оддалечуваат по грабежот.
Иако точната вредност на украдените предмети не е официјално откриена, постојат извештаи дека нивната вредност би можела да достигне до 1 милион евра.
