Обединетото Кралство ја национализираше „Бритиш Стил“ за да ја заштити иднината на домашното производство на челик, соопшти владата во четврток, со што се заврши преземањето на до неодамна компанијата во кинеска сопственост.
Национализацијата на Британската компанија за челик беше неопходна за заштита на националните интереси на Велика Британија, според владиното соопштение, пренесува Poslovni.hr.
„Британскиот челик е дел од идентитетот на нашата нација и темел на британската индустриска моќ. Денешната одлука ја обезбедува иднината на производството на челик во Велика Британија, ги штити квалификуваните работни места и го штити виталниот национален капацитет“, рече премиерот (Кир Стармер).
Во април минатата година, владата ја презеде оперативната контрола врз „Бритиш Стил“ од нејзините кинески сопственици „Џингје Груп“ за да спречи затворање на железарницата Сканторп во северна Англија и да спаси 2.700 работни места во самата фабрика, како и илјадници други во синџирот на снабдување.
Последната примарна челичарница во Велика Британија ги снабдува железничките, градежните и автомобилските индустрии, но во последниве години се соочува со високи домашни трошоци за енергија и прекумерна понуда на челик на глобалниот пазар.
Во мај оваа година, премиерот Стармер објави дека владата, по неуспешната потрага по купувач, ќе донесе закон што ќе овозможи преземање на „Бритиш Стил“.
Компанијата беше приватизирана во 1988 година за време на мандатот на премиерката Маргарет Тачер.
Владата сега назначи нов менаџерски тим кој ќе се фокусира на стабилизирање на бизнисот, управување со здравјето и безбедноста при работа, одржување на производството и соработка со менаџментот, синдикатите и вработените за трансформирање на „Бритиш стил“ во комерцијално одржлива компанија со ниски јаглеродни емисии, се вели во соопштението.
„Британскиот челик сега му припаѓа на британскиот народ, а нашиот фокус е на иднината“, рече министерот за бизнис и трговија Питер Кајл.
