Еден човек се самозапали пред седиштето на Обединетите нации во Њујорк вечерва откако на тротоарот постави знаме поврзано со тибетската влада во егзил.
Маж се самозапали синоќа пред седиштето на Обединетите нации во Њујорк.
Според извештаите на локалните медиуми и снимките од социјалните мрежи, кратко пред тоа, околу 19 часот по локално време, тој поставил знаме поврзано со тибетската влада во егзил на тротоарот на аголот од Ист 43-та улица и Прва авенија.
Надзорните камери на ОН го снимија човекот како го поставува знамето, а потоа се полива со запалива течност и го запалува. Тој беше префрлен во болницата Белвју во критична состојба, додека полицијата започна истрага за инцидентот.
На местото на настанот беа пронајдени документи со пораката: „Кина, надвор од Тибет“ . Знамето остана на тротоарот околу еден час по инцидентот, пред да биде отстрането.
Долготрајниот спор околу Тибет
Знамето што го поставил човекот е симбол на неуспешното востание против кинеската власт во 1959 година. По задушувањето на востанието, во северна Индија биле формирани тибетски парламент и влада во егзил.
Кина не ја признава таа администрација и тврди дека Тибет е дел од Кина од 13 век. Пекинг ја презеде контролата врз регионот во 1951 година, во она што го опишува како „мирно ослободување“. Од друга страна, Далај Лама верува дека Тибет бил независна држава во времето на влегувањето на Кинеската народноослободителна армија.
