Канадскиот производител на деловни авиони „Бомбардие“ објави дека продолжува да вработува работници во Соединетите Американски Држави.
Компанијата планира да пополни околу 500 слободни работни места во САД, и покрај заканата од американскиот претседател Доналд Трамп дека на компанијата ќе ѝ биде забрането да продава авиони на американскиот пазар, објави Ројтерс.
Дел од новите работни места се однесуваат на нов сервисен центар во Форт Вејн, Индијана, чие отворање е закажано за средината на ноември.
Авионите „Бомбардие“ сè уште можат да им се испорачаат на американските клиенти и покрај заканата на Трамп дека ќе ја забрани компанијата со седиште во Монтреал на американскиот пазар, соопштија извори од авијациската индустрија.
Се вели дека ова е најновиот показател дека авиоиндустријата засега е ослободена од трговската војна меѓу САД и Канада.
Најновиот пакет одмазднички мерки на САД против Канада, воведен во вторник, не го опфаќаше воздухопловниот сектор.
Претставник на Белата куќа изјави во средата дека администрацијата на претседателот Трамп подготвува можна акција против Бомбардие.
Минатата година, Трамп се согласи да го обнови договорот стар неколку децении, со кој авионите и нивните делови се ослободени од царини.
Соединетите Американски Држави се клучен пазар за „Бомбардие“, сочинувајќи околу половина од продажбата на компанијата.
Со оглед на можноста „Бомбардие“ да го изгуби пристапот до тој пазар, некои републикански пратеници се обратија до Белата куќа за да ги заштитат работните места што ги обезбедува компанијата во САД.
