За прв пат во поновата историја, Данска распореди воени регрути во Гренланд, потег што ја покажува растечката стратешка важност на Арктикот.
Распоредувањето на трупите доаѓа во време на зголемени тензии, особено по изјавите на американскиот претседател Доналд Трамп за желбата на САД да ја преземат контролата врз Гренланд, објавува „Телеграф“.
Трамп го бранеше овој став од причини поврзани со националната безбедност и го критикуваше Копенхаген за она што го смета за недостаток на инвестиции во заштитата на Арктикот.
Данска и Гренланд остро се спротивставија на идејата за промена на статусот на територијата.
Регрутите се дел од првата група од новата програма за воена служба на Данска, која е проширена за да се подготват војници способни да дејствуваат во некои од најтешките и стратешки важни области на данското кралство.
Тие учествуваат во вежбата „Арктичка издржливост“, каде што се обучуваат за преживување и борбени операции во екстремни температури и сурови климатски услови.
„Нашето присуство овде покажува дека не мислиме само на себе, туку и на луѓето во Гренланд“, рече 19-годишниот Давид, еден од регрутите.
Копенхаген вети милијарди долари за зајакнување на одбраната на Арктикот, откако данскиот министер за одбрана призна дека регионот бил запоставен со години.
Вежбата е дел од „Арктик сентри“, мисија на НАТО започната оваа година за зголемување на присуството на алијансата на Арктикот и управување со тензиите во рамките на НАТО по изјавите на Трамп за Гренланд.
Во меѓувреме, Русија, која има најголемо воено присуство на Арктикот, го критикуваше проширувањето на активностите на НАТО, нарекувајќи го директна закана за безбедноста и фактор што го зголемува ризикот од судир.
Кина, исто така, ја зголеми својата активност во регионот богат со минерали, главно преку соработка со Москва.
Северно од Арктичкиот круг, данските регрути се соочуваат со екстремен терен, со голи карпи, огромни простори и ниски температури, во средина каде што климатските услови можат да бидат подеднакво предизвикувачки како и самите воени операции.
„Верувам дека ова испраќа јасна порака дека Данска се зајакнува за иднината“, рече 22-годишниот Антон, друг регрут.
