Криста Пајк, затвореничка осудена на смрт во Тенеси, САД, е во критична состојба, во несвест и на вентилатор, откако преживеа обид за егзекуција со смртоносна инјекција.
На 50-годишната Пајк и биле дадени две дози пентобарбитал на 30 септември, но погубувањето не било завршено, пишува Би-Би-Си
Таа беше пренесена со амбулантно возило во болница во Нешвил, каде што лекарите се обидуваат да ја стабилизираат и да го отстранат лекот од нејзиното тело.
Нејзините адвокати во итно барање до судот наведоа дека обете раце на Пајк биле отечени, изгорени и со плускавци откако ѝ бил даден лекот.
Според нив, проблемите со поставувањето на интравенозните линии можеби предизвикале пентобарбиталот да навлезе во околните ткива, наместо целосно да влезе во крвотокот.
Сведоците на егзекуцијата рекоа дека Пајк сè уште дишела по двете дози. Тие изјавија дека можело да се чуе како плаче, се задишува и ‘рчи.
Нејзините адвокати тврдат дека тимот за егзекуција не сфатил дека интравенозните линии не биле правилно поставени.
Одделот за корекции на Тенеси соопшти дека постапката е спроведена според државниот протокол. Гувернерот Бил Ли нареди независна истрага и ги суспендираше другите егзекуции закажани за остатокот од годината.
Пајк беше осудена на смрт за убиството на 19-годишната Колин Слемер во 1995 година. Таа имала 18 години во времето на злосторството. Доколку погубувањето беше извршено, Пајк ќе беше првата жена погубена во Тенеси по повеќе од 200 години.
Адвокатите на Пајк сега бараат да се зачуваат сите докази поврзани со егзекуцијата и побараа смртната казна да се замени со доживотен затвор.
