Ново истражување од Јапонија сугерира дека секојдневната исхрана може да игра клучна улога во забавувањето на стареењето на мозокот, со посебен фокус на внесот на витамин Ц.
Сеопфатната опсервациска студија, објавена во угледното научно списание PLOS ONE , опфати 2.044 испитаници од јапонскиот град Хиросаки. Истражувањето првично беше започнато за анализа на ризикот од деменција и срцеви заболувања, а просечната возраст на учесниците беше 69 години, при што учествуваа 61 процент жени.
Истражувачите го измериле точното ниво на витамин Ц во крвта на испитаниците, по што го анализирале волуменот на сивата и белата мозочна материја користејќи магнетна резонанца (МРИ).
Дури и кога беа земени предвид надворешни фактори како што се возраста, пушењето, дијабетесот и другите животни навики, резултатите покажаа јасна конзистентност: луѓето со пониски нивоа на витамин Ц во крвта имаа помал волумен на мозочното ткиво и помалку развиени структурни мрежни обрасци.
„Нашата студија покажува дека постарите лица со повисоки нивоа на витамин Ц во крвта имаат подобро зачувана структура на мозокот (сива материја) и посилни врски во рамките на мрежата на стандарден режим (DMN). Тоа е клучна мозочна мрежа вклучена во меморијата и когнитивните функции“, вели д-р Томохиро Шинтаку, доцент на Одделот за радиологија, Медицински факултет на Универзитетот Хиросаки.
д-р Шинтаку нагласи дека ова е прво истражување кое директно ги поврзува вистинските нивоа на витамин Ц во крвната плазма со структурната поврзаност на оваа мрежа, која е нормално првата што е нападната кај болести како што се Алцхајмеровата болест и депресијата.
За разлика од претходните студии кои се потпираа на субјективни проценки за тоа што јаделе учесниците, ова истражување користеше прецизни лабораториски крвни тестови. Бидејќи човечкото тело не може самостојно да синтетизира витамин Ц, неговата концентрација директно зависи од дневната исхрана.
Експертите нагласуваат дека одржувањето на оптимални нивоа на овој витамин преку балансирана исхрана – богата со агруми, бобинки, домати и зелен лиснат зеленчук – е едноставен, но моќен начин за поддршка на здравјето на мозокот за време на стареењето.
