Американскиот претседател Доналд Трамп изјави дека Кина ги шпионира САД, но истакна дека Вашингтон собира разузнавачки информации за Пекинг на ист начин.
Неговата изјава уследи по извештајот на „Волстрит џурнал“ дека кинески субјекти му доставиле сателитски снимки на Иран пред ракетниот напад врз воздухопловната база во Јордан, во кој беа убиени тројца американски војници.
„Тие во основа го прават она што го правиме ние“, рече Трамп за Кина, кога беше замолен да коментира за извештајот во весник дека кинеските субјекти наводно му обезбедиле на Иран сателитски снимки со висока резолуција од воздухопловната база „Мувафак Салти“ во Јордан пред ракетниот напад на Техеран на 17 јули, објави „Фокс њуз“.
На прашањето дали ќе разговара за ова прашање со кинескиот претседател Си Џинпинг за време на неговата посета на САД, Трамп рече дека Си „се однесувал доста добро“ и дека американската страна се однесувала доста добро.
„Знаете што велат? Дека Кина нè шпионира, на што велам дека сте во право, а ние ги шпионираме нив“ , рече Трамп.
„Волстрит џурнал“ објави дека американските претставници ги поврзале сателитските снимки со иранскиот напад врз јорданската база на 17 јули, кога беа убиени тројца припадници на американските вооружени сили. Според американските претставници, случајот претставува најјасен показател досега дека
поддршката на кинеските субјекти на Иран за време на војната имала смртоносни последици за американските војници , објави „ВСЈ“. Сепак, американските претставници не кажаа кои кинески актери биле вклучени, ниту пак директно го именуваа Пекинг како учесник во нападот. Според претходните најави, Си треба да пристигне во Вашингтон на 24 септември, каде што е планиран самит со Трамп, потсети „Фокс њуз“.
