Археолозите направија извонредно откритие на локацијата на античкиот град Оксиринх, на територијата на денешен Египет. Пронајдена е мумија на чиј стомак бил прикачен фрагмент од „Илијада“ на Хомер, јавува CNN.
Мумии со запечатени папирусни пакувања, за кои се претпоставува дека содржеле ритуални формули што се користат за време на балсамирањето, се откриени во областа и претходно
„Ова е големо откритие за нас. Досега не знаевме дека литературни текстови се користеле како дел од овој погребен ритуал“, рече Игнаси-Ксавиер Адиего, филолог од Универзитетот во Барселона и член на тимот што го истражува локалитетот со години.
Според соопштението од Универзитетот во Барселона, мумијата е пронајдена во денешниот египетски град Ал Бахнас, околу 200 километри јужно од Каиро, и е стара околу 1.600 години, односно потекнува од римскиот период.
Иако папирусот е оштетен и во лоша состојба, археолозите успеале да утврдат дека текстот доаѓа од каталогот на бродови во втората книга од грчката епска поема, рече Адиего.
„Немавме можност да го проучуваме со напредни методи како што е рендгенското снимање, што ќе ни дадеше подобро отчитување. Направивме сè што можевме без да го оштетиме папирусот“, рече тој.
Archaeologists working at the ancient city of Oxyrhynchus in Egypt have unearthed a mummy with a passage from Homer’s “Iliad” stuck to its abdomen, in a first-of-its-kind discovery. https://t.co/2ARrFvC9ug pic.twitter.com/18oMEKnz2N
— CNN International (@cnni) April 30, 2026
Затоа, истражувањето е сè уште во рана фаза и многу важни прашања остануваат неодговорени. Досега, малку се знае за улогата на папирусите во процесот на балсамирање, додаде Адиего, иако една претпоставка е дека тие служеле како еден вид потпис на балсамер. Поранешните наоди на папируси со ритуални упатства ги наведоа некои научници да заклучат дека тие имале заштитна функција.
„Идејата дека папирус со литературен текст би имал иста функција е многу необична. Во овој момент не можеме со сигурност да кажеме каква е неговата улога“, додаде Адиего.
Исто така, малку се знае за животот на луѓето чии мумии биле пронајдени на ова место, освен дека нивните семејства сигурно имале одредено ниво на богатство за да можат да си дозволат балсамирање. Египетското Министерство за туризам и антиквитети соопшти дека ископувањата откриле три гробници од варовник со повеќе мумии, од кои три имале златни листови на нивните јазици, додека една имала бакарна.
Во соопштение објавено на Фејсбук претходно овој месец се вели дека во една соба е пронајден голем контејнер во кој се содржани кремирани останки од возрасен, како и коски од дете и глава од мачка. Остатоците биле завиткани во парчиња ткаенина. Во друга просторија е пронајден сличен контејнер со кремирани останки од две лица и коски од ист вид животно.
