Канцеларијата на обвинителството во Рим отвори истрага против непознати лица под сомнение за трговија со луѓе и сексуално насилство врз малолетници во рамките на таканаречените „досиеја Епштајн“, објавија денес италијанските медиуми.
Истрагата беше покрената по извештајот поднесен кон крајот на март од здружението „Differenza Donna“, кое анализираше обемна документација објавена во Соединетите Држави за американскиот финансиер Џефри Епштајн , кој беше во центарот на скандал поврзан со сексуална експлоатација на малолетници и кој почина во затвор во 2019 година.
Во прегледаната документација, Италија се споменува во значителна мера, објавува RAI News.
Островот Капри се споменува повеќе од 250 пати, со бројни референци за престој и патувања во други важни туристички и политички центри во Италија, вклучувајќи ги Рим, Милано, крајбрежјето Амалфи и Коста Смералда на Сардинија.
Во документите се наведени и контакти со истакнати личности од италијанскиот економски, деловен и политички живот.
Целта на римските истражители е да го утврдат степенот на можна вмешаност на тие лица и да проверат дали зад престојот и контактите на Епштајн во Италија стоела мрежа за регрутирање или сексуална експлоатација на млади жени и малолетници.
Како дел од истрагата, римските обвинители испратија барање за меѓународна правна помош до Министерството за правда на САД , со барање за пристап до документи и архивски материјали кои сè уште се класифицирани како државни тајни.
Со тоа, Италија се придружува на другите европски земји кои веќе започнаа независни прекугранични истраги.
Исходот од истрагата на римското обвинителство, како и можноста за утврдување на евентуална кривична одговорност, ќе зависи од одговорот на Вашингтон на барањата на италијанското судство.
