Премиерот и претседател на ВМРО-ДПМНЕ, Христијан Мицкоски, вчера по седницата на Извршниот комитет на партијата го објави предложениот состав на својот нов кабинет. Мицкоски информираше и за договорените ресори со коалициските партнери „ВЛЕН“ и ЗНАМ. Се очекува предлогот за новиот состав на Владата да биде испратен до Собранието до петок, а новиот состав на владата да биде избран најдоцна до средината на јули.
„Пред да преминеме на решенија, сакам да најавам дека оваа реконструкција на Владата означува почеток на нова фаза по изминатите две години работа на оваа Влада, исполнета со сериозни предизвици, поставување темели, стабилизирање на состојбата и спроведување крупни проекти. Сега доаѓа период во кој фокусот ќе биде уште поголем на ефикасноста, динамичноста и испораката на резултати за граѓаните. Нова енергија за ново забрзување“, рече премиерот Мицкоски.
Секој службеник, нагласи тој, мора да биде достапен, одговорен и целосно посветен на работата.
Мицкоски објави дека нов министер за здравство ќе биде Сашо Клековски, досегашниот директор на Фондот за здравствено осигурување, а на негово место ќе дојде Златко Перински, кој моментално е министер за локална самоуправа. Предлог за нов министер за социјална политика, демографија и млади е Ѓоко Велковски, досегашниот заменик-министер во истото министерство. Станува збор за два нови ресори со кои во иднина ќе раководат кадри на ВМРО-ДПМНЕ.
Нов министер за локална самоуправа ќе биде Иван Стоиљковиќ. Министер без ресор, одговорен за интеграција и спроведување на Стратегијата за вклучување на Ромите, ќе биде Ерџан Демир, дипломиран економист кој досега беше претседател на Централниот комитет на ВМРО-ДПМНЕ во општина Шуто Оризара. Нема да има вицепремиер за добро управување и тој ресор ќе биде под надлежност на Канцеларијата на премиерот.
„Сегашниот оддел за добро управување, имено вицепремиерот во Владата за добро управување, се укинува и тој оддел за добро управување ќе биде директно под надлежност на кабинетот на премиерот. Веќе имаме секретар кој ја следи работата на Владата и спроведувањето на програмата, сега ќе имаме и секретар од кабинетот кој ќе биде одговорен за добро управување“, информираше премиерот Мицкоски.
Владинoто мнозинство ќе биде зголемено за еден пратеник од Демократската партија на Турците, која ќе стане дел од коалицијата предводена од ВМРО-ДПМНЕ, за што е постигнат договор. Партијата ќе добие министер без ресор.
„ВЛЕН“ ги презема министерствата за правда, култура и туризам и односи меѓу заедниците, додека ќе продолжи да ги води секторите за животна средина, европски прашања и економија и труд.
ЗНАМ објави дека го презема Министерството за земјоделство, шумарство и водостопанство и дека нејзин предлог за министер е актуелниот државен секретар во Министерството, Борче Серафимовски. Горан Минчев останува на чело на Министерството за јавна администрација.
