Еден популарен пијалок би можел да помогне во контролата на два вообичаени здравствени проблеми – висок крвен притисок и висок холестерол, покажуваат истражувањата, објавува „Дејли експрес“. Редовното консумирање сок од портокал, како дел од балансирана исхрана, е поврзано со позитивни ефекти врз здравјето на срцето и крвните садови.
Студија од 2021 година, објавена во Европскиот журнал за исхрана, покажа дека пиењето сок од портокал во текот на 12 недели го намалува крвниот притисок кај учесниците. Истражувачите забележаа дека хесперидинот, соединение кое се наоѓа во сокот од портокал, може да помогне во намалувањето на систолниот и пулсниот притисок кај луѓе со прехипертензија и блага хипертензија. Слични резултати беа пронајдени во студија од 2013 година, која откри „значително“ намалување на крвниот притисок по 60 дена редовно консумирање сок.
Две чаши на ден се поврзани со намалување на холестеролот
Кога станува збор за холестеролот, студија од 2023 година објавена во „Липиди во здравје и болести“ откри дека луѓето кои пиеле околу две чаши сок од портокал дневно најмалку една година имале „значително пониски“ нивоа на вкупен холестерол. Мета-анализа на девет студии, исто така, откри дека редовното консумирање сок може да помогне во намалувањето на LDL, или „лошиот“ холестерол.
Сепак, лекарите и нутриционистите предупредуваат дека сокот од портокал содржи многу шеќер – една чаша може да има до 24 грама. Британската NHS препорачува балансирана исхрана, редовно вежбање, помалку сол и масти, откажување од пушење и умерено внесување алкохол за контрола на крвниот притисок и холестеролот.
