Дијагнозата на висок крвен притисок е сериозно здравствено предупредување. Состојбата, позната и како хипертензија, е поврзана со зголемен ризик од срцеви заболувања и мозочен удар, поради што е клучно да се направи сè за да се вратат вредностите на притисокот во нормала.
„Бидејќи станува збор за комплексна состојба, нејзиното лекување често бара комбинација од промени во животниот стил и, доколку е потребно, лекови“, вели за Parade Алисон Меклафлин, клинички диететичар специјализиран за кардиолошки пациенти во Центарот за исхрана „Френсис Стерн“ во Медицинскиот центар Тафтс. Активности како редовно вежбање, одржување здрава тежина и балансирана исхрана можат да ви помогнат да го доведете крвниот притисок во опсег што е прифатлив и за вас и за вашиот лекар.
Иако постојат многу работи што можете да ги направите за да го намалите крвниот притисок, еден пијалок може да има особено големо влијание. Секако, тоа не е единственото нешто што треба да го правите, но истражувањата покажуваат дека редовното пиење на овој пијалок може да помогне во намалувањето на крвниот притисок. Нутриционистите се согласуваат.
Најдобриот пијалок за намалување на крвниот притисок според четири кардиолози-диететичари
Тоа е сок од цвекло. „Цвеклото е извор на нитрати, кои телото ги претвора во азотен оксид“, вели Џулија Зумпано, регистриран диететичар во клиниката Кливленд.
„Ова соединение ги опушта и шири крвните садови, подобрувајќи го протокот на крв и намалувајќи го притисокот врз нивните ѕидови.“
Пиењето сок од цвекло го препорачува и Никол Роуч, главен нутриционист во болницата „Ленокс Хил“ во Нортвел.
„Цвеклото содржи и калиум, уште еден електролит кој помага во намалувањето на крвниот притисок“, рече таа.
Иако консумирањето цвекло ќе има одреден ефект и врз крвниот притисок, „сокот од цвекло обезбедува поконцентриран извор на нитрати“, забележува Зумпано. Цвеклото е исто така богато со антиоксиданси и влакна, и двете хранливи материи кои го поддржуваат кардиоваскуларното здравје и крвниот притисок, објаснува Мери Москера Кохран, диететичар во Медицинскиот центар Векснер на Државниот универзитет во Охајо.
Не постојат големи истражувања за да се потврдат ефектите на сокот од цвекло врз намалувањето на крвниот притисок, но се спроведени неколку мали клинички испитувања. Едно двојно слепо, рандомизирано, плацебо-контролирано испитување од 2019 година вклучувало здрави учесници кои пиеле или сок од цвекло или плацебо пијалок без нитрати.
Истражувачите откриле дека учесниците кои пиеле вистински сок од цвекло имале просечен пад на систолниот крвен притисок од 5,2 mmHg во рок од 30 минути. Систолниот крвен притисок е највисоката бројка на мерењето, што го означува максималниот притисок во артериите кога срцето чука.
Научен преглед објавен во 2022 година, во кој се анализирани седум студии со вкупно 218 учесници, откри дека пиењето сок од цвекло доведува до „значајни промени“ во систолниот крвен притисок, со просечен пад од околу 5 mmHg.
„Од сите проучени пијалоци, сокот од цвекло има најсилни докази што потврдуваат дека редовната консумација го намалува систолниот крвен притисок“, вели Меклафлин.
Доколку имате висок крвен притисок, вашиот лекар може да препорача диета со малку сол за да ви помогне да го намалите крвниот притисок, вели Роуч. Затоа таа советува да бидете „претпазливи“ во врска со пијалоците што содржат сол. Тие може да вклучуваат спортски пијалоци на база на електролити, како и некои зеленчукови сокови, вели таа.
Како да се дизајнира диета за здрав крвен притисок
Важно е да разговарате со вашиот лекар пред да направите какви било промени во исхраната за да го намалите крвниот притисок, но повеќето ќе препорачаат диета со низок внес на натриум, вели Роуч. Американската асоцијација за срце препорачува дневен внес на натриум не повеќе од 2.300 милиграми, со идеална граница од 1.500 милиграми.
Роуч предлага да се користат замени за сол при готвење, како што се лук, пипер, кромид, ким, босилек и коријандер. Таа исто така советува да се избере свежа храна наместо конзервирана храна и да се бараат сосови, преливи или зачини како прилог кога се јаде надвор.
Зумпано, исто така, препорачува зголемување на внесот на калиум, бидејќи му помага на телото да се ослободи од вишокот натриум.
,,Храната богата со калиум вклучува лиснат зеленчук, авокадо, банани, компири, грав, јаткасти плодови и домати“, вели таа.
Ако не сте љубител на цвекло, Кокран предлага да консумирате друга храна богата со азотен оксид, како што се лук, лиснат зеленчук и темно чоколадо.
Исто така е важно да се одржува активен животен стил.
„Редовното аеробно вежбање може да го намали високиот крвен притисок за околу 5 до 8 mm Hg“, вели Роуч.
„Важно е да се држите до редовно вежбање за да ги одржите овие придобивки.“
Секако, високиот крвен притисок е комплексна состојба на која може да влијаат голем број фактори. На крајот на краиштата, најдобро е да се консултирате со вашиот лекар за животните навики што можете да ги усвоите за да го намалите крвниот притисок.
