Централниот окружен суд во Сеул го осуди поранешниот јужнокорејски претседател Јун Сук-јеол на 30 години затвор откако го прогласи за виновен за наредување на операција за инфилтрација на беспилотни летала во Северна Кореја, со цел предизвикување прекугранични тензии и создавање услови за објавување војна кон крајот на 2024 година.
Судот ја прифати препораката на специјалниот обвинител Чо Еун-сук и го прогласи поранешниот претседател за виновен по повеќе точки од обвинението, вклучувајќи злоупотреба на службената должност и дела за кои се смета дека ги загрозуваат националните интереси, објави Јонхап.
Според пресудата, Џун ја наредил операцијата во октомври 2024 година со цел да го испровоцира Пјонгјанг и да го искористи евентуалното влошување на односите меѓу двете Кореи како оправдување за прогласување воена состојба на 3 декември истата година.
Поранешниот министер за одбрана Ким Џонг-хјун беше исто така осуден на 30 години затвор за неговата улога во операцијата, додека поранешниот началник на Командата за контраразузнавачки операции Јео Ин-хјун беше осуден на 15 години затвор.
Поранешниот командант на Командата за операции со беспилотни летала, Ким Џонг-де, доби условна казна од три години со пробен период од пет години.
Образложувајќи ја пресудата, судот наведе дека обвинетите, под маската на воена операција, се обиделе да ја провоцираат Северна Кореја со цел да создадат услови за воведување воена состојба.
Ова е најновата во низата пресуди против поранешниот претседател, кој веќе е во притвор за други дејствија поврзани со неговиот обид за воведување воена состојба.
Во февруари, Џун беше осуден на доживотен затвор за водење бунт преку прогласување воена состојба, и тој поднесе жалба против таа казна.
