Рускиот претседател Владимир Путин денес тврди дека руските сили ја презеле стратешката иницијатива на целиот фронт во Украина, ветувајќи проширување на таканаречената тампон зона. Путин тврди дека руските сили ја имаат иницијативата, дека окупирале повеќе од 300 населени места во текот на 2025 година и дека се подготвени да ја забрзаат офанзивата, пишува Киев пост.
„Оваа година означи пресвртница“
Зборувајќи на состанокот на одборот на руското Министерство за одбрана, Путин рече дека 2025 година означила „значајна пресвртница“ во воената кампања. Според него, руските сили се способни да ги забрзаат офанзивните операции во „стратешки важните области“ на фронтот.
„Руските вооружени сили го уништуваат непријателот, вклучувајќи ги и нивните елитни единици обучени во западните воени центри“, рече тој.
Модернизација на армијата и ново оружје
Путин се пофали и со модернизацијата на морнарицата, наведувајќи дека руската морнарица добила нови подморници во 2025 година, како и 19 површински бродови и помошни бродови.
Тој рече дека Русија успешно ги тестирала својата крстосувачка ракета на нуклеарен погон „Буревестник“ и нуклеарниот подводен дрон „Посејдон“, нагласувајќи дека системите „веќе постојат“ и дека ќе продолжат да се подобруваат. Додаде дека вториот систем, ракетата „Орешник“, ќе биде „ставена во борбена готовност до крајот на годината“.
„Нападот врз Европа е лага и бесмислица“
Во исто време, Путин ги отфрли предупредувањата за можен руски напад врз Европа како „лаги и бесмислици“. Тој ги обвини европските политичари за поттикнување хистерија и „влевање страв во главите на луѓето“ во врска со непосредна конфронтација со Русија.
И покрај овие изјави, тој ја повтори намерата на Москва да ја прошири безбедносната тампон-зона во Украина и инсистираше дека „целите на СВО ќе бидат постигнати“, користејќи го терминот на Кремљ за војната против Украина.
