Националниот парк Шар Планина соопшти дека два млади балкански риса биле снимени од надзорна камера во заштитеното подрачје.
Со овие две нови единки, вкупниот број на овие диви животни сега е пет, а станува збор за редок и загрозен вид, пишува Телеграфи .
„Во нашите фото-стапици на територијата на паркот, неодамна беа забележани две нови единки од балканскиот рис. Тие беа забележани за време на редовното следење, во делот од територијата што административно припаѓа на општина Врапчиште. Со ова се зголемува бројот на идентификувани единки од рис од 3 на 5.“
И двете единки се во добра здравствена состојба, што е показател за стабилизацијата и закрепнувањето на популацијата на овој редок вид на Шар Планина.
„Благодарение на посветеноста на тимот на Националниот парк, бројот на диви животни, особено рисот, се зголемува, што го потврдува позитивниот ефект од мерките за заштита на природата“, се вели во соопштението.
