Новите американски царини за беспилотни летала и некои од нивните компоненти стапија на сила денес, а стапките достигнуваат до 100%, како дел од напорите на Вашингтон да ја намали зависноста од кинеските добавувачи.
Американскиот претседател Доналд Трамп ја потпиша наредбата за воведување на царините во август, наведувајќи ги загриженоста за националната безбедност и целта за зајакнување на синџирите на снабдување во САД.
Дроновите со тежина над 25 килограми, оние со термални камери и автоматски бази за слетување и полнење, ќе се соочат со такса од 100%, додека помалите дронови ќе имаат такса од 25%.
Одлуката доаѓа во време кога беспилотните летала станаа важен дел од војувањето и надзорот, особено по искуството од војната во Украина.
САД се особено загрижени за својата зависност од кинеските производители, при што DJI доминира на глобалниот пазар на дронови.
Пекинг се спротивстави на одлуката, предупредувајќи дека царините би можеле да им наштетат на глобалните синџири на снабдување и конкуренцијата во индустријата.
