Американскиот претседател Доналд Трамп изјави дека Европската Унија мора да го ратификува трговскиот договор со САД до 4 јули или ќе се соочи со „многу повисоки“ царини, откако европските претставници не успеаја да постигнат конечен договор за спроведување на договорот.
Трамп изјави дека разговарал за ова прашање со претседателката на Европската комисија, Урсула фон дер Лајен, и дека ѝ дал рок до 250-годишнината од независноста на САД.
„Се согласивме дека има време до роденденот на нашата земја, во спротивно царините веднаш ќе се зголемат на многу повисоки нивоа“, напиша Трамп на својата социјална мрежа Truth Social.
Овогодинешниот Ден на независноста на САД, кој се слави на 4 јули, ја одбележува 250-годишнината од прогласувањето на независноста на американските колонии од британската власт.
Фон дер Лајен во четвртокот изјави дека Европската Унија постигнала „добар напредок“ кон ратификацијата на договорот на почетокот на јули.
„Остануваме целосно посветени на неговото спроведување, од двете страни“, рече таа на мрежата X.
Европската Унија и САД постигнаа договор минатиот јули, со кој царините за повеќето европски стоки се утврдени на 15 проценти. Сепак, Трамп изрази незадоволство од бавното спроведување на договорот.
Ситуацијата беше дополнително комплицирана со одлуката на Врховниот суд на САД од февруари, во која се заклучи дека Трамп ги пречекорил своите овластувања кога вовел широк спектар на царини, вклучително и оние против Европската Унија.
После тоа, американската администрација воведе привремена царина од 10 проценти додека се обидува да најде потрајни начини за реорганизирање на трговската политика.
Сепак, пресудата не влијаеше на секторските тарифи како што се оние за автомобили, кои беа намалени на 15 проценти според договорот со ЕУ.
Бидејќи договорот сè уште чека потврда од земјите-членки на Европската унија, Трамп минатата недела се закани дека ќе ги зголеми царините за европските автомобили и камиони на 25 проценти, обвинувајќи ја ЕУ дека не го почитува својот дел од договорот.
Кипар, кој моментално претседава со Советот на Европската Унија, изјави дека сака да одржи „позитивен моментум“ во разговорите со европратениците закажани за 19 мај.
Трамп повторно ја критикуваше Европската Унија на „Truth Social“, истакнувајќи дека долго време чека ЕУ да ги исполни своите обврски од она што го нарече „историски трговски договор“ постигнат во Тарнбери, Шкотска.
„ЕУ вети дека ќе го исполни својот дел од договорот и, како што е договорено, ќе ги намали своите царини на нула“, рече Трамп.
На крајот на март, Европскиот парламент даде условно одобрение за договорот за царини со администрацијата на Трамп, но европските претставници побараа дополнителни заштитни механизми пред конечното спроведување на договорот.
