Швајцарската државна транспортна компанија „Постауто“ го претстави својот најнов и најсмел проект наречен „Амиго“ во Алтштетен во источниот дел од земјата.
За прв пат во Швајцарија, автономни (без возач) електрични возила спроведуваат тестови на површина од 80 квадратни километри во кантоните Санкт Гален и двата Апенцела, објавува весникот „Ноје Цирихер Цајтунг“ (NZZ).
Федералната канцеларија за патишта (Astra) веќе даде официјална дозвола за овој проект. Иако од безбедносни причини сè уште има возач во автомобилот подготвен да интервенира, автомобилите возат сами без потреба да го допираат воланот. Целта е од 2027 година, патниците во овие периферни области да можат да резервираат автономни патувања преку апликација.
Во текот на следната година, бројот на овие возила во Алтштетен ќе достигне 25. Следната фаза предвидува возачот во возилото целосно да биде заменет со центар за далечинско управување, каде што вработен ќе надгледува неколку автомобили истовремено.
Возилата и технологијата што се користат доаѓаат од кинескиот гигант „Баиду“, кој е светски лидер во оваа област. Оваа соработка покрена прашања во врска со безбедноста на податоците, но раководителите на „Постауто“ уверија дека сите податоци се анонимизирани во возилото, лицата не се снимаат и ниедна информација не ја напушта Швајцарија. За Кинезите, исполнувањето на строгите швајцарски стандарди служи како мост за проширување на европскиот пазар.
Директорот на „Постауто“, Стефан Регли, објасни за „НЗЗ“ дека овој систем нема да ги замени класичните линии, туку ќе служи како дополнување за приградските населби и доцните часови.
Покрај подобрувањето на услугата, проектот се смета за среднорочен спас за кантоните, бидејќи трошоците за персонал се високи, а пазарот се соочува со голем недостиг на возачи.
