Рекордни 7,6 тони кокаин наменет за Холандија беа откриени во пристаништето Картахена, што е најголемата заплена на дрога во последните десет години.
Колумбиската полиција заплени 7,6 тони кокаин во пристаништето Картахена, на север од Колумбија, на брегот на Карипското Море. Дрогата била наменета за Холандија, а ова е најголемата заплена на кокаин во тоа пристаниште во последните десет години, пишува Euronews.
Колумбискиот претседател Абелардо де ла Есприела ја објави веста на социјалната мрежа X. „Националната полиција штотуку ја изврши најголемата заплена на кокаин во пристаништето Картахена во последните десет години“, напиша тој.
Според колумбиската полиција, кокаинот бил скриен во пратка панела, вид нерафиниран шеќер од трска што најчесто се користи во Латинска Америка. Дрогата ја пронашле полицајци специјализирани за борба против трговијата со дрога, за време на операција спроведена во соработка со Агенцијата за борба против дрога на САД (ДЕА).
„Нема примирје во борбата против наркотероризмот“
Колумбискиот претседател изјави дека во текот на првите 75 дена од неговото владеење, безбедносните сили заплениле вкупно 132 тони кокаин, чија вредност се проценува на околу 6,1 милијарди долари.
– Нема примирје во борбата против наркотероризмот! Секоја доза што ја спречуваме да стигне до улицата спасува животи, а секој долар што го земаме од нив ги ослабува нивните криминални структури – рече тој.
Во одделен случај, двајца холандски државјани беа уапсени во Колумбија на барање на холандските власти, потврди канцеларијата на холандскиот јавен обвинител за локалниот весник AD. Колумбиските обвинители објавија дека станува збор за мажи по име Рони и Улрих.
Досега не е потврдено дали овие апсења се поврзани со заплената на 7,6 тони кокаин во пристаништето Картахена.
Според податоците од Агенцијата за дрога на Европската унија, во 2024 година во Европската унија се запленети 330 тони кокаин, што е помалку отколку во 2023 година, кога беа запленети 419 тони.
