Енергетските пијалоци и додатоците во исхраната со кофеин се значително почесто поврзани со сериозни срцеви проблеми, вклучувајќи срцева слабост и срцев удар, отколку другите прехранбени производи, објави денес Американската асоцијација за срце.
Анализирајќи повеќе од 28.000 извештаи до Американската администрација за храна и лекови (FDA) помеѓу 2017 и 2025 година, истражувачите откриле дека луѓето на возраст од 18 до 34 години почесто пријавуваат дека консумираат енергетски пијалоци пред да развијат проблеми со срцето.
Продажбата на енергетски пијалоци се дуплираше во изминатата деценија на повеќе од 20 милијарди долари, и иако експертите велат дека умерениот дневен внес на кофеин до 400 милиграми е генерално безбеден за здрави возрасни лица, некои енергетски пијалоци содржат до три пати повеќе кофеин на милилитар од обичното кафе.
Ситуацијата е уште покомплицирана со додатоците што се користат пред тренинг, кај кои концентрацијата на кофеин може да биде дванаесет пати поголема.
Бидејќи релевантните регулаторни агенции ги третираат овие производи како храна или додатоци во исхраната, тие не подлежат на истите безбедносни проверки како што се подложуваат конвенционалните лекови.
Авторот на студијата, Саи Самаџамантула од Универзитетот во Вирџинија, истакнува дека овие производи се продаваат на полиците веднаш до обичната вода и сокови, поради што потрошувачите погрешно претпоставуваат дека се целосно безбедни.
Истражувачите забележуваат дека се потребни потемелни студии и систематско следење за целосно разбирање на долгорочните последици од консумирањето на овие производи врз здравјето на срцето.
