Неколку лица беа ранети во центарот на Атина во вторник, откако вооружен човек отвори оган во канцеларија за социјално осигурување, а потоа и во судница, соопштија грчките власти.
Полицијата соопшти дека осомничениот, вооружен со пушка, прво отворил оган кон канцеларијата на Социјалното осигурување во центарот на грчката престолнина, повредувајќи еден вработен. Полицајците кои пристигнале на местото на настанот му помогнале на повредениот човек, но напаѓачот во меѓувреме избегал.
Истиот човек потоа е осомничен дека отворил оган на приземјето од судската зграда во Атина, каде што биле ранети уште неколку лица. Полицијата соопшти дека пронашла пушка и започнала операција за потрага по напаѓачот, за кој грчките медиуми тврдат дека има 89 години.
Снимките од државната телевизија ЕРТ њуз покажаа екипи за итни случаи како извлекуваат најмалку три лица од судницата и ги транспортираат до амбулантни возила. Мотивот за нападот засега е непознат.
ЕРТ објави дека по пукањето во судот, напаѓачот наводно фрлил пликови со документи на подот, тврдејќи дека тоа се причините за неговите постапки. Насилството со оружје е релативно ретко во Грција, каде што поседувањето огнено оружје е дозволено, но според строги правила.
