Помеѓу април и август, Литванија откри 12 тунели на својата граница што водат кон Белорусија, кои биле наменети за мигрантите да влезат во оваа балтичка земја, членка на Европската Унија.
Ова го потврди министерот за внатрешни работи, Мартинас Кателинас, објави агенцијата ДПА.
„Забележуваме загрижувачки развој во областа на граничната безбедност“, рече Кателинас за време на парламентарната седница во Вилнус, објави новинската агенција БНС.
– Заканата од нерегуларна миграција расте, а тунелите ископани под државната граница стануваат нелегална алтернатива за нелегален влез во Република Литванија – рече тој.
Литванија, како и Латвија и Полска, постојано ја обвинува Белорусија за систематско доведување мигранти од кризните подрачја до надворешната граница на Европската Унија.
Владата во Вилнус одговори со зајакнување на граничната заштита и изградба на гранична ограда. Тунели беа откриени и на границите на Латвија и Полска со Белорусија.
Како одговор на откривањето на тунелот, литванската гранична стража изготви акционен план, рече Кателинас, а соработката со европската агенција за заштита на границите Фронтекс и приватните организации е дополнително зајакната.
Исто така, се тестираат радарски уреди што продираат во земјата, а се набавува и специјализирана опрема за откривање на подземни шуплини, додаде министерот.
