Хакерски групи поврзани со Иран успешно хакирале најмалку 50 безбедносни камери низ Израел и избришале податоци од најмалку 60 израелски компании од почетокот на војната, објави Националната кибердирекција на Израел.
Според портпаролката на директоратот, главната цел на преземањето на контролата врз камерите била да се процени штетата по иранските ракетни напади, како и да се следат движењата на израелските трупи. Сè уште не е јасно колку долго хакерите имале непречен пристап до камерите пред да се забележи проблемот, објавува „Волстрит џурнал“ (WSJ).
Покрај системите за надзор, цел на напади беше и израелскиот приватен сектор. Хакерите упаднаа во системите на најмалку 60 израелски компании и организации, што претставува нагло зголемување на ваквите инциденти од почетокот на конфликтот. Жртвите се претежно мали и средни претпријатија, вклучувајќи адвокатски, инженерски и архитектонски бироа. Во некои случаи, избришаните податоци се трајно уништени и не можат да се обноват.
Рафаел Франко, поранешен заменик-генерален директор на израелската сајбер-дирекција и основач на „Код Блу“, компанија која работеше на некои од овие случаи, истакна дека нападите биле извршени од најмалку три одделни хакерски групи.
Тие користеле ранливости и застарени безбедносни алатки, како што се застарени firewall-ови, за да добијат пристап до системите. Интересен детаљ е што една хакерска група случајно ја исклучила својата VPN мрежа во средината на нападот, откривајќи ја нивната точна локација во Техеран.
Кибер активностите на Иран не се ограничени исклучиво на територијата на Израел. Компаниите за кибер безбедност забележуваат дека во последните недели, ирански групи се обиделе да хакираат безбедносни камери во земјите од Заливот, како што се Саудиска Арабија, Обединетите Арапски Емирати и Бахреин.
Исто така, САД забележаа зголемување на иранските сајбер напади, при што една хакерска група неодамна тврдеше дека успешно ја хакирала приватната сметка на директорот на ФБИ, Кеш Пател.
Од друга страна, Израел, кој поседува исклучително силни офанзивни сајбер капацитети, активно возвраќа ударот. За време на војната, израелските служби ги хакираа сообраќајните камери во Иран за да добијат информации во реално време, што наводно помогнало во следењето на движењата на поранешниот врховен лидер на Иран.
