Во главниот град на Кина беше одржана свечена вечера за американската делегација предводена од Доналд Трамп, а фотографиите од оваа средба уште еднаш го покажаа раскошот на оваа долгоочекувана средба.
На почетокот на гала вечерата, на гостите им се обрати Си Џинпинг, кој нагласи дека САД и Кина треба да бидат партнери, а не соперници.
„Денес, претседателот Трамп и јас имавме детални разговори за односите меѓу Кина и САД и меѓународната и регионалната динамика. Двајцата веруваме дека односите меѓу Кина и САД се најважните билатерални односи во светот. Мора да ги направиме успешни и никогаш да не ги уништиме. Кина и САД можат да добијат од соработката, а да изгубат од конфронтацијата. Нашите две земји треба да бидат партнери, а не соперници“, рече Си.
По говорот, Си Џинпинг крена чаша вино и извика „На здравје“.
Од друга страна, Трамп во својот говор нагласи дека оваа средба била голема чест.
„Имавме продуктивни разговори и бев пречекан величествено како ниеден друг функционер. Беше голема чест да бидам со вас“, рече Трамп и го покани Си да ги посети САД на 24 септември годинава.
Тој исто така рече дека Си Џинпинг е голем лидер.
„Си Џинпинг е голем лидер, а Кина е голема земја. Имам длабоко почитување кон претседателот и кинескиот народ“, рече тој.
Храната што се сервира на вечерата, исто така, привлече внимание. Доналд Трамп, навикнат да јаде во „Мекдоналдс“, беше принуден да го прошири своето мени за време на настанот.
Менито вклучуваше јастог во доматна супа, крцкави говедски ребра, пекиншка патка, динстан сезонски зеленчук, бавно варен лосос во сенф сос и тесто во облик на труба.
Белата куќа соопшти дека двајцата лидери се согласиле да формираат нов „Комитет за трговија“ – механизам што би можел да ги олесни идните трговски врски, иако американските претставници предупредија дека тој е далеку од оперативен.
Пекинг, исто така, сигнализираше подготвеност да купува американски земјоделски производи и енергетски производи, но не се објавени детали.
Си рече дека неодамнешните трговски разговори во Јужна Кореја постигнале „напредок“, предупредувајќи дека Тајван е најважното прашање во односите меѓу Кина и САД – прашање кое би можело да ги турне двете земји кон многу опасна ситуација.
