Американските научници развија крвен тест кој би можел да открие промени што претходат на ракот на јајниците, пред да се развие тумор. Во истражувањето, тестот препознал повеќе од 92 проценти од жените со такви промени, но сè уште не е достапен во клиничката пракса.
Истражувањето го спроведе Институтот за рак „Хоаг Фемили“ од Калифорнија, во соработка со меѓународни партнери, а резултатите беа објавени во списанието „Нејчр Медисин“, пишува порталот „Њуз-Медицин“.
Тестот го мери нивото на молекулата на РНК наречена Ту-строма во крвта. Истражувачите откриле дека неговото ниво е покачено кај жени со серозен тубален интраепителен карцином (STIC), микроскопска промена во јајцеводите што претходи на најчестата и најагресивна форма на рак на јајниците , како и кај жени со рана фаза на оваа болест .
Промени што не се видливи во снимката
STIC не може да се открие со снимање или стандардни крвни тестови, па затоа денес најчесто се открива случајно, за време на операција на јајцеводите или јајниците извршена од некоја друга причина.
При проверка на посебна група примероци, новиот тест открил STIC кај 92,3 проценти од жените кои ја имале оваа промена , додека правилно препознал 98,2 проценти од здравите жени.
„Ракот на јајниците не започнува денот кога ќе откриеме тумор“, рече Рајан Гогна, директор на транслационите истражувања во институтот, додавајќи дека болеста започнува многу порано , со микроскопски промени во јајцеводите.
Главниот истражувач, Еша Мадан, верува дека тестот би можел да го промени пристапот кон превенцијата кај жени со висок ризик , вклучувајќи ги и носителите на мутации на гените BRCA1 и BRCA2.
Според неа, целта не е само порано откривање на болеста, туку и спречување на развојот на инвазивен рак.
Доаѓаат нови студии
Истражувачите нагласуваат дека анализирале претходно собрани примероци од крв од жени чија дијагноза веќе била позната.
Затоа, тие планираат нови студии во кои ќе следат жени со и без зголемен генетски ризик , со цел да утврдат колку рано тестот може да открие промени и дали може да им помогне на лекарите во донесувањето одлуки за третман.
Засега, тестот не е клинички одобрен или достапен за пациентите, а не е познато кога би можел да биде во поширока употреба.
