Американскиот претседател Доналд Трамп објави дека операцијата „Проект слобода“, која беше започната со цел да се обезбеди безбедно минување на бродовите низ Ормутскиот теснец, е привремено суспендирана, сè додека не се види дали договорот ќе биде финализиран и потпишан.
„Имаме заеднички договор дека иако блокадата ќе остане во полна сила и ефект, „Проектот слобода“ ќе биде паузиран за кратко време за да се види дали може да се финализира и потпише договор“, напиша Трамп на социјалните мрежи.
Немаше непосредна реакција од Техеран во раните утрински часови во среда.
Трамп ја донесе одлуката за паузирање на операцијата само два дена по објавувањето на нејзиното започнување. „Проектот Слобода“ беше замислен како иницијатива во рамките на која Соединетите Американски Држави би „насочиле“ бродови низ Ормутскиот Теснец како „хуманитарен гест“, со цел да им помогнат на неутралните земји погодени од американско-израелскиот конфликт со Иран.
Американскиот министер за одбрана Пит Хегсет и високиот воен функционер Ден Кејн изјавија дека „Проектот слобода“ е посебна операција во однос на воената акција на САД против Иран наречена „Операција епски бес“.
„„Проектот слобода“ е одбранбен по природа, ограничен по обем и привремен по времетраење, со една мисија – да ги заштити невините комерцијални бродови од иранската агресија. Американските сили нема да мора да влегуваат во иранските води или воздушен простор. Тоа не е потребно. Ние не бараме конфликт“, рече Хегсет.
Тој додаде дека стотици бродови моментално чекаат во ред за да поминат низ оваа стратешки важна поморска рута.
Неколку часа пред одлуката на Трамп, американскиот државен секретар Марко Рубио, исто така, го опиша „Проектот слобода“ како помала, одбранбена операција, нагласувајќи дека САД нема да се ангажираат воено „освен ако не бидат нападнати“.
Во меѓувреме, хемискиот танкер CS Anthem го напушти Ормутскиот теснец во понеделник, потврди неговиот оператор, со што стана втор комерцијален брод под американско знаме што поминал низ теснецот под американска воена заштита.
Компанијата „Маерск“ објави дека бродот „Алијанс Ферфакс“, кој плови под американско знаме и е управуван од нејзината подружница „Фарел Лајнс“, исто така го напуштил Заливот преку Ормутскиот теснец.
