Рускиот нафтен гигант Лукоил во понеделник соопшти дека ја прифатил понудата од глобалниот трговец со енергија „Гунвор“ да ги купи сите негови странски средства, потег на втората по големина руска нафтена компанија што доаѓа како директен резултат на санкциите што Вашингтон ѝ ги воведе минатата недела .
Планираната продажба претставува најзначајниот чекор преземен досега од руска компанија како одговор на западните санкции воведени поради војната во Украина, која започна со руската инвазија во 2022 година.
Лукоил во соопштение потврди дека ја прифатил понудата на Гунвор за продажба на Лукоил Интернешнл ГмбХ, која управува со сите странски средства на нафтениот гигант.
„Клучните услови на трансакцијата беа претходно договорени меѓу страните. Од своја страна, (Лукоил) ја прифати понудата, обврзувајќи се да не преговара со други потенцијални купувачи“, соопшти Лукоил.
„Гунвор“, чиј мнозински сопственик е шведскиот милијардер Торбјорн Тернквист, исто така потврди дека се во преговори со „Лукоил“ за евентуално преземање.
Гунвор инвестира огромни профити
Министерството за финансии на САД издаде дозвола со која компаниите имаат рок до 21 ноември да ги завршат сите трансакции со Лукоил и Роснефт, уште една руска енергетска компанија која е цел на нова рунда санкции.
„Доколку е потребно, страните планираат да поднесат барање за продолжување на постојната дозвола“, соопшти Лукоил, додавајќи дека целиот договор е предмет на одобрување од Канцеларијата за контрола на странски средства на Министерството за финансии на САД.
