Сè повеќе кинески туристи плаќаат за да доживеат симулирани природни катастрофи, како што се тајфуни и поплави, а расте и интересот за посета на места обележани со трагедии, како дел од тренд познат како „темен туризам“.
Леон Лв (28) од Чонгкинг патувала повеќе од 1.300 километри до Хангџоу за да учествува во симулација на поплава предизвикана од тајфун . За време на вежбата, стотици тони вода ги однеле учесниците кон заштитната бариера, а таа вели дека научила како да остане смирена и да се заштити во такви ситуации, пишува денес „Гардијан“.
Базата Хангжу Лвсинг, која отвори центар од 200.000 квадратни метри во 2024 година, нуди симулации на тајфуни, лизгања на земјиште и други катастрофи.
Извршниот директор на компанијата, Ванг Куангхан, вели дека многу посетители доаѓаат поради возбудата, а повеќето индивидуални клиенти се луѓе во своите дваесетти и триесетти години.
Компанијата планира да отвори уште пет центри низ Кина во следните три години и да воведе симулации на земјотреси и пожари.
Слични содржини нудат и јавните институции. Музејот за јавна безбедност Хајдијан во Пекинг организира симулации на земјотреси, цунами и пожари, додека Гуангжу минатата година отвори петкатен центар за обука за итни случаи, комплетен со симулатор на земјотрес со јачина од 7,2 степени.
Директорот на Факултетот за хотелски и туристички менаџмент на Кинескиот универзитет во Хонг Конг, Роберт Ли, проценува дека новата генерација кинески патници сака директно да ги доживее одредени места, а не само да посетува познати туристички атракции.
Покрај симулираните катастрофи, некои туристи посетуваат и вистински места на трагедии.
Во Беичуан, град во покраината Сечуан, уништен од земјотресот во 2008 година, во кој загинаа повеќе од 70.000 луѓе, урнатините на зградите се зачувани за јавноста да може да ги обиколува.
Посетителите се особено импресионирани од остатоците од училиштата и застанатите часовници што потсетуваат на моментот кога земјотресот го погодил подрачјето.
Туристичкиот водич Саманта Ванг, исто така, го забележува растечкиот интерес за Спомен-салата за жртвите од масакрот во Нанкинг.
Според кинеските официјални податоци, јапонската царска армија убила 300.000 цивили и војници за време на масакрот во 1937 година. Јапонија признава дека голем број цивили биле убиени, но вели дека бројот на жртви е тешко да се утврди.
Влезот во спомен-салата е бесплатен, но потребно е однапред да резервирате онлајн.
Локалната самоуправа обезбедува 25.000 седишта дневно, а билетите честопати беа распродадени однапред во текот на август.
