Израелскиот премиер Бенјамин Нетанјаху и шефот на Мосад, Роман Гофман, сакале да извршат операција на иранска територија пред изборите на 27 октомври, но биле спречени од САД, тврди израелската телевизија Канал 12.
Канал 12, во извештај кој не наведува извори и не е потврден, тврди дека операцијата не била поддржана од високи функционери во израелскиот безбедносен апарат.
Според овие наводи, тие се плашеле дека акцијата би можела да предизвика голема ескалација и да го спречи одржувањето на изборите според распоредот.
Припадник на израелските безбедносни служби, тврди Канал 12, направил грешка што довело до сознанието на САД за планот. Потоа Вашингтон брзо реагирал и ја запрел операцијата.
Во извештајот не се прецизира за каков вид операција станува збор, ниту каква грешка направил израелскиот оперативец.
Роман Гофман ја презеде функцијата шеф на Мосад во јуни оваа година, а „Тајмс оф Израел“, кој го објави извештајот на Канал 12, го опишува како лојален на Нетанјаху.
