На 21 октомври 2026 година, Н.Е. Сецуко Кавахара, амбасадорка на Јапонија, присуствуваше на церемонијата по повод примопредавањето на успешно завршениот проект во рамките на Програмата за грантови за мали проекти (GGP) во општина Могила. Домаќин на церемонијата беше градоначалникот на Општина Могила, Драганчо Саботковски.
Во рамките на проектот беше обезбедено ново возило за собирање отпад од марката „Mitsubishi Fuso Canter“ за потребите на Општина Могила, во вкупна вредност од 68.194 евра. Возилото ќе ја подобри ефикасноста на собирањето отпад и ќе придонесе за спречување на создавањето диви депонии и појавата на пожари во руралните средини, носејќи придобивки за повеќе од 5.200 жители од општината.
Од 1996 година, преку Програмата за грант-помош за локални проекти (GGP), Јапонија има финансирано вкупно 190 проекти во Северна Македонија, во вредност од речиси 10 милиони евра, потврдувајќи ги силните билатерални односи и пријателството меѓу двете земји.
