Повеќето авиокомпании веќе ги зголемија цените на билетите, бројот на летови се намалува, а се зголемија и трошоците за превоз на багаж.
Додека светот продолжува да ги чувствува ефектите од ескалацијата на конфликтот меѓу Израел, САД и Иран што започна кон крајот на февруари 2026 година, авиоиндустријата се соочува со најголемата криза од пандемијата COVID-19. Затворањето на воздушниот простор над поголемиот дел од Блискиот Исток, блокадата на Ормутскиот теснец и ракетните напади доведоа до масовни откажувања на летови, нагло зголемување на цените на керозинот , нарушување на глобалните рути и зголемување на цените на авионските билети.
Европската федерација за транспорт и животна средина, невладина организација, соопшти дека прекинот на глобалните испораки на нафта поради војната во Иран ја зголемил цената на летовите на долги релации од Европа за речиси 90 евра, што би можело да доведе до повисоки цени на билетите.
Споредувајќи ги цените од минатата недела со оние пред почетокот на конфликтот, T&E истакна дека горивото за лет од Барселона до Берлин би било за 26 евра поскапо по патник, додека патување на долга релација од Париз до Њујорк би чинело за 129 евра повеќе трошоци за гориво.
Новите даноци ги зголемуваат цените на авиопревозот
Наглиот пораст на цените на керозинот, предизвикан од американско-израелската војна против Иран, ги принуди авиокомпаниите да ги зголемат цените на летовите и да воведат дополнителни такси. Цените на млазното гориво се зголемија од 85-90 долари за барел на 150-200 долари во последните недели, нанесувајќи му сериозен финансиски удар на индустријата каде што горивото сочинува околу една четвртина од оперативните трошоци.
Меѓу најчестите мерки се воведувањето нови доплати за гориво. „Ер Франс“ (во рамките на групацијата Ер Франс-КЛМ) објави зголемување на цената на билетите на долги релации за 50 евра по повратен лет, а на некои линии таа доплата подоцна беше двојно зголемена на 100 евра. Од 5 април, кинеската „Чајна Истерн ерлајнс“ воведе нова доплата за гориво на домашните летови – околу 8 долари (60 јуани) за летови до 800 км, или 17 долари (120 јуани) за подолги линии.
Најголемата индиска авиокомпанија „ИндиГо“ воведе такси за гориво на сите летови, вклучувајќи 900 рупии за летови до Блискиот Исток и 2.300 рупии за летови до Европа. „СанЕкспрес“ (заедничко претпријатие на „Туркиш ерлајнс“ и „Луфтханза“) ќе воведе привремен доплата за гориво од 10 евра по патник на линиите меѓу Турција и Европа од 1 мај.
„Луфтханза“ откажува 20.000 летови
Од друга страна, некои компании одлучија да ги зголемат надоместоците за багаж . „Американ ерлајнс“ ја зголеми цената на првиот и вториот чекиран багаж за 10 долари, додека третиот багаж сега чини 150 долари на домашни и кратки меѓународни летови.
Слични мерки воведоа и „ЏетБлу“ (зголемување од 4 на 9 долари), „Делта ерлајнс“ (3,5 проценти за првиот и вториот багаж плус 50 долари за третиот) и канадската авиокомпанија „Вестџет“, која додаде доплата за гориво од 43 долари за одредени резервации. Засега, „Луфтханза“ се потпира главно на мерки за штедење, како што е претходното приземјување на авионите на „СитиЛајн“, наместо на воведување директни нови такси.
Во контекст на глобалните промени на рутите, германската авиокомпанија „Луфтханза“ соопшти дека ќе откаже околу 20.000 летови на кратки релации до октомври, по предвременото затворање на нејзината регионална подружница „Луфтханза СитиЛајн“, како дел од мерките за намалување на трошоците поради зголемувањето на цените на горивата.
Кризата на Блискиот Исток не е единствениот удар врз авијацијата, бидејќи додека авиокомпаниите воведуваат нови даноци поради скокот на цените на горивата, нискобуџетниот гигант „Рајанер“ ги заострува односите со Австрија, пишува „Хојте“.
Директорот Мајкл О’Лири изјави дека ако данокот на воздушен сообраќај остане, Линц би можел да биде исклучен од зимската мрежа на летови. Патниците од Горна Австрија би можеле да се пренасочат кон Братислава и да летаат поевтино, бидејќи во Словачка не се наплаќаат дополнителни даноци.
