Меѓународниот монетарен фонд информира дека се очекува ударот од зголемувањето на цените на енергијата како резултат на војната на Блискиот Исток негативно да влијае врз економскиот раст и да ги зголеми инфлациските притисоци во Северна Македонија.
Според проекциите, се очекува реалниот раст на БДП да забави на 3,1 проценти во 2026 година и постепено да се стабилизира околу потенцијалот од 3 проценти на среден рок. Во исто време, се очекува повисоките глобални цени на нафтата да ја зголемат инфлацијата на околу 4,5 проценти во 2026 година, што ќе ги зголеми загриженостите за прифатливоста на енергијата, се вели во соопштението на ММФ.
ММФ потсетува на неодамнешните мерки преземени од владата во Скопјe за ублажување на влијанието, вклучително и намалување на ДДВ-то на горивата од 18 на 10 проценти и ослободување на мазут од државните резерви за да се држат трошоците за производство на електрична енергија под контрола.
Според ММФ, поради зголемениот увоз на енергија, се очекува дефицитот на тековната сметка да се зголеми на околу 5 проценти од БДП во 2026 година, пред постепено да се намали на околу 3 проценти на среден рок, како што се стабилизираат глобалните пазари на стоки.
„Ризиците за перспективите се насочени надолу. Продолжениот конфликт на Блискиот Исток и повисоките цени на енергијата, во комбинација со послаб раст во ЕУ, би можеле дополнително да ја забават економската активност, да ја одржат инфлацијата висока подолго време, да ја ослабат надворешната позиција и да ја одложат фискалната консолидација“, предупредува ММФ.
Институцијата, исто така, предупредува дека на домашен план, фискалните отстапувања – особено од честите и непланирани зголемувања на платите и пензиите, како и пречекорувањата на трошоците во големите инфраструктурни проекти – би можеле да ја загрозат фискалната консолидација и да ја намалат довербата на пазарот.
