Федерален трговски суд во САД донесе одлука со која дел од царините воведени од администрацијата на Доналд Трамп се прогласени за незаконски, а на американските институции им е наложено да започнат процес за враќање на наплатените средства кон компаниите. Одлуката се однесува на тарифите воведени преку вонредни претседателски овластувања, за кои судот оцени дека немале доволна законска основа.
Според пресудата на Врховниот суд на САД од февруари 2026 година, Законот за меѓународни економски овластувања во вонредни состојби (IEEPA) не му дава право на претседателот еднострано да воведува царини. Судот оцени дека овластувањето за воведување царини му припаѓа на Конгресот, а не на извршната власт.
По оваа одлука, американската Царинска служба започна подготовка на систем за автоматско враќање на средствата кон компаниите кои плаќале спорни царини. Според светските медиуми, станува збор за можен поврат од околу 166 милијарди долари кон повеќе од 330.000 увозници.
Дополнително, американскиот Суд за меѓународна трговија деновиве пресуди и против новите глобални царини од 10 проценти воведени според член 122 од Законот за трговија од 1974 година, оценувајќи дека тие не биле законски оправдани.
Компании како Adidas веќе соопштија дека очекуваат значителен поврат на средства поради судските одлуки. Извршниот директор на компанијата изјави дека Adidas има право на поврат од околу 300 милиони долари од американските царини.
Трамп нема право еднострано да воведува царини! Федералниот суд во САД ги поништи дел од царините: Компаниите ќе добијат поврат на средства
