Додатоците на колаген добиваат на популарност поради нивните потенцијални придобивки за кожата, зглобовите и мускулите, но експертите предупредуваат дека научните докази сè уште не се доволно силни.
Анализата на голем број клинички студии покажа дека додатоците на колаген можат да имаат корисен ефект врз хидратацијата и еластичноста на кожата, намалувајќи ја болката во зглобовите и поддржувајќи го здравјето на мускулите.
Сепак, резултатите не се секогаш конзистентни, па затоа не може со сигурност да се каже дека ќе има ист ефект врз сите корисници.
Еден од проблемите е што студиите значително се разликуваат една од друга. Користени се различни видови колаген, различни дози и методи на администрација, што го отежнува прецизното споредување на резултатите.
Покрај тоа, голем број студии беа оценети како методолошки слаби, главно поради малиот број испитаници и краткото времетраење на следењето.
Не сите додатоци на колаген се исти
Колагенот може да се добие од различни извори, вклучувајќи говеда, свињи, живина, риби и други морски организми. На пазарот постојат и производи кои се претставени како билни алтернативи на колагенот.
Разлики постојат и во начинот на обработка , што може да влијае на апсорпцијата и дејството во телото.
Други фактори
Експертите нагласуваат дека резултатите од суплементацијата се под влијание на бројни други фактори, како што се исхраната, изложеноста на сонце, квалитетот на спиењето, пушењето, хормоналниот статус и животните навики. Затоа, често е тешко да се утврди дали позитивните промени се должат на самиот колаген или на други околности.
Иако претходните истражувања покажуваат дека додатоците на колаген можат да донесат одредени придобивки, научниците веруваат дека се потребни поквалитетни и подетални студии за попрецизно да се утврди кој може да има најголема корист од нивната употреба и кои видови колаген даваат најдобри резултати, објавува scitechdaily.com.
