Кардиохирург д-р Џереми Лондон, кој е сертифициран по општа васкуларна и торакална хирургија, откри пет навики што треба да ги избегнуваме ако сакаме да го забавиме стареењето и да живееме подолго. Интересно е што неговата листа не вклучува алкохол, туку пушење и вејпинг, седечки начин на живот, дебелина, хроничен стрес и лош сон, објавува Express.co.uk.
Д-р Лондон, кој често ги споделува своите совети на социјалните медиуми, објасни кои навики докажано го забрзуваат стареењето.
„Првата е прилично очигледна: пушењето. Тоа негативно влијае на речиси секој органски систем во телото, а дури и мали количини цигари го скратуваат животниот век“, рече тој.
„Втората е седечкиот начин на живот. Дури и ако редовно вежбате, седењето на работа од шест до осум часа на ден влијае на метаболизмот на гликозата и митохондријалната функција. Нашите тела се дизајнирани да се движат.“
Опасноста од висцерални масти и стрес
Д-р Лондон ја стави дебелината на трето место на својата листа, со важно појаснување.
„И не мислам само на бројот на вагата, туку на распределбата на масното ткиво, особено на абдоминалната или висцералната маст. Тоа е познат предизвикувач на хронични заболувања“, нагласи тој.
Потоа тој го наведе хроничниот стрес.
,,Зборувам за стрес на високо ниво: губење на работата, сериозна болест на близок, финансиски грижи или проблеми во врската – сè што не исчезнува само така. Високите и постојани нивоа на кортизол и други стрес хормони имаат негативно влијание врз целокупното здравје.“
Основата на здравјето е квалитетен сон.
Како последна клучна поента, д-р Лондон го истакна лошиот сон.
,,Сонот е апсолутна основа на сè. Додека спиеме, телото се поправа и регенерира“, објасни тој.
,,Ако овој процес не е правилен, ризикот од разни болести се зголемува.“
Тој заклучи дека стареењето е неизбежно, но како старееме зависи од нашите одлуки.
„Сите ќе старееме, тоа е неизбежно. Но, како старееме, тоа е наш избор“, рече тој.
А што е со алкохолот?
Иако алкохолот не беше на оваа листа, д-р Лондон целосно го исфрли од својот живот во 2021 година. Тој вели дека тоа го прави да се чувствува многу подобро и е една од најважните одлуки што некогаш ги донел.
„Алкохолот е токсичен за секоја клетка во телото“, рече тој претходно. „Верувам дека алкохолот ќе стане она што некогаш беше пушењето цигари.“
