Расте тензијата поради нуклеарното оружје! Иран се снабдува со ураниум, чекајќи го доаѓањето на Трамп и неговите потези
Иран ќе започне со збогатување ураниум користејќи илјадници напредни центрифуги во два големи нуклеарни постројки, објави Меѓународната агенција за атомска енергија (МААЕ).
Ова дополнително ги зголемува тензиите во врска со нуклеарната програма на Техеран, кој долго време збогатува ураниум до нивоа на чистота што се блиску до доволно за производство на нуклеарно оружје. Нуклеарното оружје бара нивоа на збогатување ураниум од 90 проценти чистота.
Во соопштението на МААЕ, агенција на Обединетите нации (ОН), се споменува само дека Иран збогатува ураниум со нови центрифуги до ниво од пет проценти чистота, што е далеку пониско од претходните 60 проценти, што веројатно сигнализира дека сепак сака да преговара со Западот и администрацијата на избраниот американски претседател Доналд Трамп.
Сепак, засега не е познато како Трамп ќе му пристапи на Иран кога ќе ја преземе функцијата на 20 јануари, особено што Техеран продолжува да се заканува дека ќе го нападне Израел, во екот на војната на таа земја против палестинскиот Хамас во Појасот Газа и веднаш по почетокот на прекин на огнот во конфликтот меѓу Израел и либанскиот Хезболах. Во 2018 година, Трамп ги повлече САД од меѓународниот нуклеарен договор на големите сили со Иран, што беше проследено со серија напади и инциденти низ Блискиот Исток.
Откако Бордот на гувернери на МААЕ во ноември го осуди Иран дека не соработува целосно со агенцијата на ОН, Техеран се закани дека брзо ќе ја унапреди својата нуклеарна програма.
Во денешното соопштение МААЕ ги претстави плановите за кои Иран го информирал. Тие планови вклучуваат вчитување на ураниум во повеќе каскади на иранските напредни центрифуги IR-2M, IR-4 и IR-6.
Каскадите се група центрифуги кои вртат гас ураниум заедно за побрзо збогатување на ураниум. Секоја од тие напредни класи на центрифуги го збогатува ураниумот побрзо од основните ирански центрифуги IR-1, кои се главниот столб на нуклеарната програма на земјата. МААЕ не прецизираше колку машини ќе има во секоја каскада, а Иран претходно стави околу 160 центрифуги во една каскада.
