Во Германија е откриена масовна гробница од 1.000 скелети

Археолозите велат дека ја откриле најголемата масовна гробница некогаш ископана во Европа.

Околу 1.000 скелети на жртви од чума досега се пронајдени во масовната гробница во центарот на германскиот град Нирнберг, во која експертите веруваат дека може да има вкупно повеќе од 1.500 луѓе.

Остатоците се откриени при археолошко истражување пред изградбата на нови станбени згради во градот.

Мелани Лангбејн од одделот за зачувување на наследството во Нирнберг изјави за Си-Ен-Ен дека се идентификувани осум јами за чума, од кои секоја има неколку стотици тела.

„Тие луѓе не беа погребани на редовни гробишта, иако имаме гробишта на чума во Нирнберг“, рече Лангбејн.

„Ова значи дека овие мртви луѓе морале да бидат погребани во кратка временска рамка без да се земат предвид христијанските практики за погребување“, рече таа.

Нирнберг трпеше епидемии на чума приближно на секои 10 години од 14 век па наваму, што го прави предизвик да се датираат остатоците.