Вработен во прилепската болница нелегално проневери речиси 35 илјади евра, Основниот суд го осуди на две години условна затворска казна

Основниот суд во Прилеп изрече условна казна затвор од две години против вработен во прилепската болница, кој помеѓу август 2024 и април 2025 година незаконски проневери 2.110.640 денари (близу 35 илјади евра) собрани од пациенти.

Како што соопшти Управата за финансиска полиција, службеното лице од Општата болница на ИЈЗ „Борка Талески“ – Прилеп сторило кривично дело проневера во служба, согласно член 354 став 2 во врска со став 1 и во врска со член 45 од Кривичниот законик.

Иако обвинетиот ги врати средствата, судот го прогласи за виновен и му изрече условна казна од две години, која нема да ја отслужи доколку не стори ново кривично дело во следните четири години.

„Овој случај е дел од поширока истрага на Управата за финансиска полиција, која со месеци го анализира финансиското работење на прилепската болница и во исто време ја потврдува нашата посветеност на борбата против корупцијата и злоупотребата на јавните средства. Враќањето на парите не ослободува од одговорност, правдата мора да биде еднаква за сите.“

„Штетата на јавниот буџет, особено во здравствениот сектор, е неприфатлива и секој обид за прикривање или игнорирање на ваквите дејствија претставува закана за довербата на граѓаните во институциите“, соопшти Управата за финансиска полиција.