Грците одбраа да ја гледаат дебатата на политичките лидери, наместо полуфиналето на Лига на шампиони

– Рејтинзите на грчките телевизии покажуваат дека синоќа, Грците одбрале да ја гледаат ТВ дебатата на лидерите на политичките партии, наместо полуфиналниот фудбалски натпревар од Лигата на шампиони меѓу Милан и Интер.

Дебатата почна еден час порано од натпреварот и завршија речиси во исто време, а согласно податоците од Нилсен што ги објави ЕРТ, државната телевизија во просек имала 22 отсто гледаност, наспроти 17,2 проценти на телевизијата МЕГА, која го пренесуваше фудбалскиот натпревар. 

Првиот и третиот канал на ЕРТ кои во живо ја емитуваа дебатата, постигнале просечна гледаност од 20,1 и 1,9 проценти, додека пак над 2.100.000 гледачи ја гледале дебатата најмалку една минута.

ТВ дебатата, освен на државната телевизија ЕРТ во живо ја пренесуваа и уште пет приватни телевизии кои имаат помала гледаност меѓу 3,5 и 10,8 отсто.