Забраната стапи на сила: Кој ќе купи плаќа казна до 5.000 евра

Во Словенија стапи на сила забрана за продажба и купување на ароматизирани електронски цигари, а предвидени се казни од 3.000 до 5.000 евра за лица кои продаваат или нудат забранети вкусови во електронски цигари.

Оние кои купуваат забранети производи преку интернет можат да бидат казнети со парична казна од 125 до 5.000 евра, а казни им се закануваат и на поединци кои ги продаваат или нудат овие производи бесплатно на дигитални платформи, пишува словенечкиот портал 24ur. 

Беше најавено дека Здравствениот инспекторат и Даночната управа отсега ќе вршат зголемени контроли. 

Според минатогодишните измени на Законот за ограничување на употребата на тутун и сродни производи, продажбата на електронски цигари и рефили со слатки, овошни и билни ароми е забранета во Словенија, без оглед на тоа дали содржат никотин.

Дозволена е само продажба на производи со 16 дозволени состојки кои даваат вкус на тутун, според словенечкото Министерство за здравство.

„Истражувањата покажуваат дека електронските цигари ги користат и деца на возраст од 9 до 11 години. Треба да знаете дека тие му штетат на здравјето и содржат канцерогени соединенија. Главната суровина е никотинот, кој влијае на срцето и крвните садови, белите дробови и развојот на мозокот, а исто така предизвикува и зависност“, предупреди Весна Маринко, раководител на Дирекцијата за јавно здравје. 

Ароматизираните цигари, особено таканаречените вејпови со слатки и овошни вкусови, доведоа до зголемување на потрошувачката кај малолетниците за дури 200 проценти за само три години.