Кина гради главен команден центар за воениот врв во случај на активна војна
Кина гради огромен воен комплекс во западниот дел на Пекинг, за кој американските власти велат дека ќе служи како команден центар за време на активна војна и би можел да биде поголем од Пентагон, објави Фајненшл тајмс.
Сателитските снимки прегледани од американското разузнавање покажуваат локација од 600 хектари во близина на главниот град, најверојатно дизајнирана со засилени бункери за засолниште на кинеските воени лидери за време на конфликт, вклучително и нуклеарна војна.
Откако ќе биде оперативна, локацијата би можела да стане најголемиот воен команден центар во светот – повеќе од 10 пати поголема од Пентагон, според американските разузнавачи.
Изградбата, која започна во средината на 2024 година, е дел од поширокиот план за модернизација на Народноослободителната армија, чија цел е проширување на нејзиниот нуклеарен арсенал, развој на ново оружје и подобрување на координацијата во сите воени домени, вклучувајќи копно, воздух, море, вселена, сајбер и електронско војување.
„Главниот безбеден команден центар на Кина се наоѓа во западните ридови, североисточно од новиот објект и е изграден пред неколку децении во екот на Студената војна“, изјави поранешен американски функционер за „Фајненшл тајмс“.
„Големината, обемот и делумно вкопаните карактеристики на новиот објект сугерираат дека тој ќе го замени комплексот Вестерн Хилс како примарен команден објект за време на војна“.
