Мицкоски за изјавата на Ахмети: Ако некој знае каде е Груби, ќе биде сослушан во Обвинителство

Премиерот Христијан Мицкоски ја коментираше изјавата на Али Ахмет кој рече дека Груби е на албанска територија и дека ако има правда ќе се врати во земјава. Мицкоски рече дека се надева оти Обвинителството ќе го повика на информативен разговор првиот човек на ДУИ, Али Ахмети.

„Се надевам дека ова ќе стигне до обвинителството и има правна постапка во која ако имаме човек кој знае каде е бегалец од Законот, ќе го повикаат тој човек и ќе одговорат на прашањето каде е бегалецот од правдата. За сè друго можам да коментирам дека сите во државата знаат како се поставуваат обвинители и судии во последните седум години“.

„Истите луѓе без кои не можеше да помине квалификацијата преку Академијата за судии и јавни обвинители, сега велат дека некому му била ускратена правдата и дека ова е политички прогон. Да потсетам, споменатиот бегалец е на списокот со санкции на САД и таму јавно кажуваат дека ова лице заедно со друго лице е поврзано со големи корупциски скандали. Претпоставувам дека нема да го обвинат Стејт департментот за политички прогон“, изјави денеска Мицкоски.

Според премиерот, најлесно да се докаже дали некој е виновен или не е да дојде, да даде изјава и да се соочи со правдата.

„Нема ништо лошо да дојдеш и да кажеш дали си во право или не, а обвинителите и судиите одлучуваат што и како да постапат. Ние не се мешаме, нека одлучат врз основа на доказите што ќе ги добијат од истрагата“, рече Мицкоски.

Инаку, Јавното обвинителство на PCM денеска соопшти дека по Груби е распишана национална и меѓународна потерница и дека локалните и меѓународните органи задолжени за извршување на овие потерници имаат овластување да ги преземат сите неопходни мерки, вклучително и повикување на други лица доколку тие имаат информации за локацијата на Груби.