Најдобриот европски град во 2025 година: медитеранската престолнина е најпопуларната дестинација (ФОТОГРАФИИ)

Според престижното списание „Конде Наст Травелер“, најдобриот град за посета во Европа не е некоја од познатите метрополи, туку Валета, главниот град на Малта.

Секоја година, списанието „Condé Nast Traveler“ ги поканува читателите да гласаат за најдобрите места што ги посетиле. Врз основа на нивните одговори, се формира индекс на задоволство – бројка што покажува колкав процент од посетителите имале позитивно искуство на одредена дестинација. Со оглед на тоа што околу половина милион луѓе учествуваат во анкетата, висок резултат значи дека навистина голем број патници биле воодушевени од местото.

Мал главен град со голем впечаток

Оваа година, титулата најдобар европски град можеби неочекувано ја понесе  Валета , главниот град на Малта. Со дури 97,3 проценти задоволни посетители, Валета го освои првото место благодарение на својата златна архитектура, пријатната медитеранска клима и шармот што често поминува под радарот, пишува „ Тајм аут“ .

Градот плени со своите живописни предели: тесни, брановидни улици што се извиваат низ стариот центар, опкружени со тиркизно море од двете страни. Неговата единствена сценографија не останала незабележана ниту од филмските режисери – препознатливи локации биле искористени во хитови како што се „Гладијатор“ и „Игра на тронови“.

Осло – град на контрасти и хармонија

Осло е на второто место на листата, со 94,4 проценти задоволни посетители. Тоа е импресивен резултат, особено затоа што норвешката престолнина се појавува во анкетата за прв пат. CNT го нарекува „град со две лица“. Од едната страна е модерното, експериментално урбано јадро, а од другата недопрена природа, густи шуми и блескави фјордови. Овој контраст, како што наведува списанието, го прави Осло неодоливо привлечен – град кој истовремено инспирира и ве остава без здив.

Виена – хипнотизирачки класик

Третото место, со 93,7 проценти задоволни посетители, го освои Виена по втор пат по ред. Не е изненадување што овој град е сè уште близу до врвот. CNT го опишува како место кое „зрачи со прекрасна привлечност која е истовремено и хипнотизирачка и тешка за објаснување“. Културата, историјата и елеганцијата на Виена очигледно продолжуваат да оставаат силен впечаток кај посетителите.

Најдобрите градови во Европа за посета

• Валета, Малта
• Осло, Норвешка
• Виена, Австрија
• Копенхаген, Данска
• Мадрид, Шпанија
• Минхен, Германија
• Лисабон, Португалија
• Стокхолм, Шведска
• Сан Себастијан, Шпанија
• Палма, Шпанија
• Фиренца, Италија
• Атина, Грција
• Рим, Италија
• Париз, Франција
• Марсеј, Франција
• Рејкјавик, Исланд
• Порто, Португалија
• Венеција, Италија
• Будимпешта, Унгарија
• Прага, Чешка Република