Нови откритија за синдромот на скршено срце: Здравјето долгорочно е уништено, но еве што помага

За време на клиничките испитувања, лекарите дојдоа до нови научни откритија за третманот на такоцубо кардиомиопатија, или таканаречен синдром на скршено срце.

Ова е прво клиничко испитување од ваков вид во светот посветено на такоцубо кардиомиопатија, медицинска состојба позната како синдром на скршено срце што предизвикува срцевиот мускул да ја менува формата и ненадејно да ослабува, објавува „Гардијан“.

Обично е предизвикано од силен емоционален или физички стрес, како што е губењето на близок, а пациентите можат да доживеат симптоми слични на срцев удар и да се соочат со двојно поголем ризик од предвремена смрт во споредба со општата популација.

Некои пациенти доживуваат срцева слабост, што резултира со симптоми како што се замор , како и пократок животен век, а во моментов не постои лек за оваа состојба.

Сепак, сега лекарите можеби имаат одговор за ова нарушување по првото клинички контролирано испитување на синдромот на скршено срце.

Студијата покажа дека 12 недели прилагодена когнитивно-бихејвиорална терапија или програма за вежбање за кардиолошка рехабилитација, која вклучува пливање, возење велосипед и аеробик, им помогнале на пациентите да се опорават.

„Синдромот Такоцубо има сериозни ефекти врз срцето, кое може да не се врати во нормала. Знаеме дека пациентите можат да бидат засегнати до крајот на животот и дека нивното долгорочно здравје на срцето е слично на оние кои преживеале срцев удар“, рече д-р Дејвид Гембл од Медицинскиот факултет при Универзитетот во Абердин.

Д-р Гембл нагласи дека когнитивно-бихејвиоралната терапија или физичките вежби можат да им помогнат на пациентите на патот кон закрепнување.