Нордиската диета помага при слабеење и спречува срцев удар

Заворавете го Медитеранот – од студените земји на снегот и лососот доаѓа нов начин на исхрана кој покажува извонредни резултати за здравјето на срцето. Сè повеќе истражувања потврдуваат дека нордиската исхрана помага во намалување на обемот на половината, регулирање на холестеролот и одржување на крвниот притисок под контрола. Експертите веруваат дека овој посебен начин на исхрана би можел да биде пресвртница во борбата против кардиоваскуларните заболувања, кои се една од водечките причини за смрт во светот.

Што е нордиската диета?

Нордиската исхрана се базира на цела, минимално преработена храна. За разлика од западната исхрана, каде што поголемиот дел од храната е ултра-преработена, акцентот овде е на свежи, сезонски и локални состојки. Инспирирана е од традиционалната храна на Данска, Финска, Исланд, Норвешка и Шведска.

„Викинзите јаделе она што им го нудела природата, а нивната исхрана била чиста и одржлива“, објаснува нутриционистката Лорен Харис-Пинкус.

Токму оваа едноставност и потпирање на природна храна сега се поврзува со бројни здравствени придобивки.

Сличности и разлики со медитеранската исхрана

Нордиската исхрана често се споредува со медитеранската исхрана бидејќи и двете нагласуваат храна базирана на растенија, растителни влакна и риба. Меѓутоа, додека медитеранската исхрана користи маслиново масло, северна Европа претпочита масло од репка (исто така познато како масло од канола). Тоа е богато со здрави масти и алфа-линоленска киселина, растителна форма на омега-3 масни киселини кои се наоѓаат и во риби како лосос, скуша, харинга и сардини.

Докажано е дека редовна консумација на риба и масло го намалува ризикот од срцеви аритмии, го забавува формирањето на плаки во артериите и ги подобрува нивоата на масти во крвта, што се клучни фактори за здравјето на срцето.

Клучни намирници во нордиската исхрана

• Риба и морски плодови – се препорачуваат најмалку два до три пати неделно.
• Млечни производи со ниска масленост – како што се јогурт и урда.
• Целите зрна – овес, јачмен и ‘рж – се варат бавно и одржуваат стабилно ниво на шеќер во крвта.
• Зеленчукот од постудените клими – цвекло, зелка, пашканат, моркови и карфиол – е богат со растителни влакна и хранливи материи.
• Бобинки – брусницата, боровинките и јагодите се полни со антиоксиданси кои ја зачувуваат еластичноста на крвните садови.
• Живина и јајца – се консумираат умерено, додека црвеното и преработеното месо се јадат ретко.

Научно докажани придобивки

Бројни студии ги потврдија придобивките од нордиската диета. Во една, учесниците изгубиле во просек 4% од нивната телесна тежина по само шест недели. Во друга, спроведена во текот на шест месеци, дебелите луѓе изгубиле речиси 5 килограми, три пати повеќе од оние кои не го следеле овој план на исхрана.

Анализа од 2022 година покажа дека нордиската диета ги намалува нивоата на холестерол и шеќер во крвта, независно од губењето на тежината. Луѓето кои ја следеле имале пониски нивоа на заситени масти и подобра регулација на гликозата.

Уште понови истражувања сугерираат дека овој начин на исхрана може да го намали ризикот од смрт од срцеви заболувања, иако е потребна дополнителна потврда.

Исхрана за долговечност

Експертите нагласуваат дека клучот на нордиската исхрана е едноставноста и потпирањето на локалната храна. Помалку преработена храна, помалку шеќер и црвено месо, а повеќе зеленчук, риба и интегрални житарки.

„Луѓето кои сакаат бобинки, ‘ржан леб и масло од канола можат да уживаат во оваа диета без грижа на совеста. Тие не мора да чекаат дополнителни студии за да знаат дека тоа е здрав избор“, вели д-р Френк Ху од Харвардската школа за јавно здравје.